Yn 2006 penderfynodd partneriaid Diogelwch y Ffyrdd Cymru (Awdurdodau Lleol Cymru, Llywodraeth y Cynulliad, y pedwar Heddlu, Ymddiriedolaeth GIG Gwasanaethau Ambiwlans Cymru, y tri Gwasanaeth Tân ac Achub a’r Gymdeithas Frenhinol er Atal Damweiniau) y dylent fuddsoddi rhagor o adnoddau i hybu diogelwch gyrwyr ifanc.

Yn hytrach na dyfeisio cynllun newydd, cytunwyd i fuddsoddi yn y cynllun Pass Plus a cheisio, yr un pryd, ychwanegu rhagor ato. Canlyniad hynny yw bod gan yrwyr newydd yng Nghymru gyfle’n awr i gymryd Pass Plus Cymru yn hytrach na Pass Plus.

Mae Diogelwch y Ffyrdd Cymru yn estyn croeso i unrhyw Hyfforddwr Gyrru sydd wedi cofrestru ar gyfer Pass Plus ystyried cofrestru gyda Pass Plus Cymru hefyd. Dyma fanteision gwneud Pass Plus Cymru:

	Fydd pobl ifanc ond yn talu £20 am y cwrs cyfan gan fod yr awdurdodau lleol yn talu am y gweddill. Oherwydd hynny, gall llawer iawn ei fforddio.
	Byddwch chi’n rhan o gynllun sydd wedi’i gydnabod yn genedlaethol ac wedi cael cefnogaeth lawn yr Asiantaeth Safonau Gyrru.
	Gallech chi hyrwyddo Pass Plus Cymru i’ch myfyrwyr eich hunain a’u hannog i wella’u sgiliau. Daw hynny â rhagor o fusnes i chi.
	Byddwch chi’n gymwys i roi hyfforddiant Pass Plus Cymru yn eich ardal leol, ac ar hyd a lled Cymru, a chael mwy o gyfle i gyflwyno’r cwrs i fwy o fyfyrwyr. Bydd hynny’n helpu’ch busnes.
	Cewch chi adborth ar yr holl hyfforddiant a roddwch, a gallai hynny’ch helpu chi ar gyfer cyrsiau yn y dyfodol.

Mae dwy ran i Pass Plus Cymru:

1. Y Gweithdy Trafod (o leiaf ddwyawr)
Mae hwn yn ymdrin â chwe elfen cwrs Pass Plus yr Asiantaeth Safonau Gyrru, ond yna fe ychwanegir ato adrannau sy’n ystyried agwedd gyrwyr, yfed a chyffuriau, a phersbectif y gwasanaeth tân o ran eu rôl wrth ymdrin â digwyddiadau traffig ar y ffyrdd. Fe sylwyd bod y myfyrwyr sydd wedi cymryd rhan yn y sesiwn yn rhyngweithio mwy â’r hyfforddwr gyrru. O gael gwybod am amrywiaeth mawr o bynciau, mae myfyrwyr fel petaen nhw’n awyddus i gael gwybod rhagor am yrru’n well ac am ddiogelwch ar y ffyrdd. Bydd cyfnewid gwybodaeth fel hyn yn sicrhau bod pob ochr yn cael y budd a’r mwynhad mwyaf o’r sesiwn.

2. Hyfforddiant ar y Ffordd (o leiaf 8 awr)
Fe ewch chi â phâr o fyfyrwyr allan gyda’i gilydd i gymryd rhan mewn amrywiaeth o sefyllfaoedd gyrru, fel y disgrifir ym maes llafur Pass Plus. Byddwch chi’n hyfforddi’r gyrrwr ac yn annog y myfyriwr arall i wrando ac i ddysgu o’r hyfforddiant hwnnw wrth deithio. Yna, byddan nhw’n newid lle. Profiad y cyrsiau yw bod mynd â phâr allan gyda’i gilydd yn help mawr ac yn gwella’r profiad i’r ddau fyfyriwr am eu bod nhw’n cael cyfle i wrando, dysgu a myfyrio yn ogystal ag ymarfer yr hyn y maen nhw wedi’i glywed.

Y gobaith yw y bydd hyfforddwyr gyrru yn cydnabod manteision ychwanegol Pass Plus Cymru o ran helpu pobl ifanc i wella’u gyrru – a thrwy hynny helpu i gwtogi ar ddigwyddiadau annymunol ac arbed bywydau – ac, yn bwysig iawn, y bydd yn help mawr i chi a’ch busnes. Croesawn y cyfle i chi ddod yn rhan o Pass Plus Cymru, ond byddwn ni hefyd yn deall os dymunwch chi ddal i hyrwyddo’r cynllun Pass Plus safonol yn unig.

Mac Driving Excellence, ar ran Partneriaeth Diogelwch Ffyrdd Cymru, sy’n gweinyddu Pass Plus Cymru. Os oes gennych chi ddiddordeb mewn cofrestru gyda Pass Plus Cymru, cliciwch yma.

Cwestiynau a ofynnir yn aml

C. Beth sy’n digwydd wrth gofrestru?
A. Bydd gofyn i chi lofnodi contract gyda Mac Driving Excellence a bydd angen i chi fod ag Yswiriant Indemniad Proffesiynol ac Yswiriant Atebolrwydd Cyhoeddus

C. Faint y caiff hyfforddwyr gyrru eu talu?
A. Ar hyn o bryd, cân nhw £200 am y sesiwn 8-awr

C. Pwy sy’n talu’r hyfforddwyr gyrru?
A. Caiff eich ffi ei thalu gan Mac Driving Excellence, a fydd yn ceisio’i thalu cyn pen 30 diwrnod ar ôl i’r hyfforddiant gael ei gwblhau

C. Fydda i’n cymryd yr arian gan y myfyriwr?
A. Na fyddwch. Caiff y ffi o £20 ei thalu’n uniongyrchol i Mac Driving Excellence

C. Faint o waith y galla i ddisgwyl ei gael?
A. I ryw raddau, mae’n dibynnu ble’r ydych chi’n byw/gweithio gan fod mwy o gyrsiau Pass Plus Cymru ar gael mewn rhai ardaloedd na’i gilydd. Bydd hi hefyd yn dibynnu ar faint o hyfforddwyr gyrru yn eich ardal chi fydd wedi cofrestru ar gyfer Pass Plus Cymru. Ond y ffordd sicraf o gael gwaith yw i chi gyfeirio gyrrwr newydd at gwrs Pass Plus Cymru ac i’r myfyriwr ofyn am gael ei hyfforddi gan yr hyfforddwr gyrru sydd wedi’i gyfeirio/wedi’i chyfeirio at y cwrs.

-----------------------------------------------------------------------------------------------------------------------------------------